اضحك اجدع منك ليه .. محدش واخد منها حاجه ، حتى لو مراتك منكّده عليك .. برضه اضحك ، ده عمنا صلاح جاهين قال ( الضحك ده مزيكا كهربا...
انا عايزك تضحك بقى بسبب ومن غير سبب واوعى تخلى لضحكتك فرامل ، عايزك تدوس بنزين الضحك ع الأخر وتفرم النكد فرم .. عايزك تخلّى النكد كفته ، واتلكك على اى فرحه ولو كانت صغيرة واديها ضحك ، بس اوعى تعمل زى المصريين اللى فى الحزن بيبكوا والفرح برضه بيبكوا ، سيبك من منطق ( دمعه لكل مواطن ) ، اضحك وكركر زى كركرة الشيشه .. دى الضحكة اللى بتروح ما بترجعش .
ده حتى وانت فى عز فشلك ممكن تضحك وتكمل عادى وكأن مفيش حاجه حصلت ، مش بيقولك اكتر حاجه تغيظ عدوك وتفقع مرارته حتى وانت مهزوم هى انك تضحك ، خلاص يا عم اعتبر الفشل والنكد عداوينك وكل ما تقابل حيطه سد .. كسّر ام اللى جابها بضحكتك يا ابو ضحكه جنان انت .
فى الهند ام العجايب عملوا نوادى للضحك ، والناس فى النوادى دى بيضحكوا عمال على بطال ، يعنى تدخل النادى تلاقى الكل نازل كركره بمناسبة ومن غير مناسبه ، واحنا مش اقل من الهنود اجدع ، ولو بصيت للجماعه الصينين هتلاقى البشمهندس بوذا بتاعهم فى كل التماثيل بتاعته فاشخ بقه ع الأخر وهاتك يا ضحك ، والصينين مش احسن مننا .. دحنا اللى اخترعنا الضحك والدم الخفيف .
ايه المواطنون : ( اضحكوا وكركروا الى ما لا نهايه ) ، اضحكوا ده حتى الحيوانات بتضحك ، اضحكوا ده شكل الواحد بيتغير 360 درجه للأحسن لما بيضحك ، بس فكك انت وهو من الضحكات الشريرة المتقطعه بتاعت ممثلين افلام الأبيض واسود ، الحكاية مش ناقصه شر ، خلّوا الضحك حاجه مميزه ومهمه فى حياة كل واحد فيكوا ، اضحكوا ده الضحك نور وحياة .
وفى النهاية اسمعوا النكتة دى .. قصدى اقروا النكته دى .
( بيقولك واحد بلدياتنا كان بيحب الجبنه المش اوى اوى ، وفضل شهر يفطر مش ويتغدى مش ويتعشى مش ، وكان كل ما ياكل ينسى يسمى ، وفى ليلة جاب طبق المش ولسّه راح يمد ايده ، قام الشيطان ظهرله ومسك ايده قبل ما ياكل وقاله : ابوس ايديك تسمى حرقة قلب امى ) يعنى الشيطان نفسه تعب من كتر اكل المش مع بلدياتنا #هههههه او #كركركركر زى ما انت عايز بقى .
***
محمد عبدة زيدان
التعليقات