سؤال مهم ولولبى ومحورى فى نفس ذات اللحظة .. البيض واسلوب الحياة بقوا وجهين لعمله واحده ليه ، ايه اللى خلا الأيام شبه بيض التنين والد...
سؤال مهم ولولبى ومحورى فى نفس ذات اللحظة .. البيض واسلوب الحياة بقوا وجهين لعمله واحده ليه ، ايه اللى خلا الأيام شبه بيض التنين والديناصورات .
يا ترى العيب فينا ولا فى البيض ذات نفسه ؟!
الواحد بقى يبص فى المراية ما يشوفش غير دماغ كتكوت لسه بيفقس والباقى صفار فى صفار ، الدنيا مغيمة اوى يا ريس والموج عالى والميدان زحمة وكله بيلّوش .
من كتر صفار البيض .. ابليس ذات نفسه بقى متأكد انه كان فى الأصل بيضه ، وقريب جدا هيقرر الأنتحار ويكفر للمرة التانية واحنا السبب ، يا جدعان ما تحسسوش الراجل انه فعلا نحس .
يا عالم يا هوووه حد يقولنا ايه الحل فى زمن البيض اللى عايشينه ده ، يعنى معقول هنعيش ونموت زى الحمير مش فاهمين حاجه فى اى حاجه ، ومش قادرين نعرف المشكلة فين ، وايه سببها ، وايه حلها ؟!!
طيب حتى خلّونا نتفق على ان العيب فينا يمكن نسترّيح شوية ، طيب ونتفق ليه اصلا .. هو فيه حد بيض عارف انه بيض ، وحتى لو عارف ان هو كده فعلا عمره ما هيعترف انه كده ابدا ابدا .
كل واحد فينا بقى عبارة عن بيضه ليها ايدين ورجلين ودماغ وماشية عَ الأرض ، ولو الأيام ما باضتش عليه ، ومالقاش حد يبيض عليه هو هيبيض على نفسه ، بقينا ماشيين بمنطق ( بيض على نفسك قبل ما حد غيرك يبيض عليك ) .
البيض يا اخوانا بقى فلسفه واسلوب حياة ، وكل ساعة ليه انباء زى النشرة كده بالظبط ، وعلى كل لون تلاقيه .. يعنى على حسب كل شكل واحد فينا انباء البيض بتتختلف ، هتلاقى عندك بيض عيلتك غير بيض عيلة التانى ، وبيض شغلك غير بيض شغل التانى ، وبيض اخواتك ، وبيض مراتك ، وبيض امك ، وبيض ابوك ، وبيض ولادك ، وبيض دراستك ، وبيض نظامك ، وبيض صحابك .. يييييه ما تعدش يا ابنى ، انباء البيض ما بتخلصش ولا عمرها هتخلص .
***
محمد عبدة زيدان
التعليقات