الحياة واقفه ضدك وكل ما تطلع من نقره تقع فى دحديرة ، حاولت مليون مرة فى حاجات كتير وما نجحتش ، وكأن الفشل عامل معاك عقد ابدى .. واي...
الحياة واقفه ضدك وكل ما تطلع من نقره تقع فى دحديرة ، حاولت مليون مرة فى حاجات كتير وما نجحتش ، وكأن الفشل عامل معاك عقد ابدى .. وايه يعنى ، حاول ميت مرة كمان بعد المليون واكيد فى يوم هتفشل برضه ( هههههه ) ، ما هو انت كده يا ابنى من ضمن الناس اللى النحس واخدهم على حب ، ولو اشتريت حتى كرشة هتلاقى فيها عضم ما هو انت مرزق ما شاء الله عليك ، دول لو عملوا كاس العالم فى النحس هتاخده بدون منازع ، بس انا متأكد وانت رايح تستلم الكاس هتعمل حادثة وهيلغوا الجايزة على حظك المنيل .
انت مالكش غير حل واحد وهو انك تتعلم فن التطنيش وفتح الهويس للدنيا بحالها وتدى للحياة ضهرك هتلاقيها بتجرى وراك والحظ بيقولك خد عندك ، ما اهى الدنيا دى بحالات اللى يجرى وراها بتديله بالجزمة وانت طبعا ياعم المنحوس اتهريت ضرب منها لحد ما جسمك نحّس ومابقاش يأثر فيه ضرب .. يبقى زى ما قلتلك سوق فى الهبل والتنفيض لكل حاجة واهى ماشية لحد ما تتعدل .
على فكرة انا مش بحبطك لا سمح الله لأن انت كده كده محبط جاهز ومش مستنى حد ييجى يحط عليك احباط فوق احباطك انا بس بنورلك السكة بتاعتك اللى تملى النور قاطع فيها ، وكمان مش عايزك تجرب تنجح تانى عشان احنا مش ناقصين الدنيا ترجع بينا ورا اكتر من كده ، واللى زيك لازم فعلا يتعلم فن التطنيش وفتح الهويس وما يحاولش يركز مع حد اوى عشان الناس ملهاش ذنب يا ابنى .. ما هو النحس اللى فيك معدى وممكن يصيب اى حد زى الرصاصة الطايشة كده .
جرب بس اللى قلتلك عليه وهتلاقى نفسك زى الفل ولو ما لقيتش الحياة ضحكتلك وفضل النحس ملازمك مش عايز اشوف وشك تانى وانا هابطل اعمل فيها حلال العقد .
***
التعليقات