ودّعنا ( 2014 ) بعد ما قلنا فيها العبر وكسرنا وراها ( 90 ) مليون قله زيها زى اللى قبلها وقلنا اكيد مش هتيجى سنة اغمق من كده ، وده بر...
ودّعنا ( 2014 ) بعد ما قلنا فيها العبر وكسرنا وراها ( 90 ) مليون قله زيها زى اللى قبلها وقلنا اكيد مش هتيجى سنة اغمق من كده ، وده برضه نفس الكلام اللى قلناه السنة اللى فاتت واللى هنقولوا السنة الجاية ان شاء الله ما انا اصلى عارفكم ( ما يعجبكمش العجب ولا الصيام فى رجب ) .
احتفلتم بالكريسماس وطفيتوا النور الساعة ( 12 ) وفرقعتوا الصاوريخ .. طيب مبروك عليكم خوازيق السنة اللى لسه متوفيه وعقبال خوازيق السنة الجاية .
بس احنا معندناش ( يير .. year ) عشان نقوله هابى .. احنا عندنا زير ، طبعا كلنا عارفينه .. ده تراث يا ابنى وهو اللى كنا عايشين عليه قبل اختراع الكولديرات ، وسبحان الله السنة اللى بتيجى نواحينا بتتحول بقدرة قادر لزير .. بس زير مخروم عمره ما اتملا ابدا ، والمفروض اننا بنملاه بالميه والميه يعنى حياه .. لكن احنا عاملين زى التايه اللى بيجرى غلط فى الصحرا وكل مجهودنا بيروح اونطه وفاكرين اننا بنتقدم ، خليكوا كده !! افضلوا املوا فى الزير والزير مخروم واخر السنة تلاقوه فاضى ( وترجع ريما لعادته القديمة ) .
نتقابل بقى فى ( 2030 ) ان شاء الله ان عيشنا وكان لينا عمر ، هنكون طلعنا بفرق جون وما صعدناش كاس العالم بس المره دى مدغشقر اللى هتصعد ، والزمالك هياخد المركز التانى فى الدورى برضه مع ان الأهلى مدخلش المسابقة ، ورامز جلال هيكون بيعمل ( رامز ورك البطه ) ، وعمرو دياب جنن البنات والولاد بتسريحته الجديده فى البومه ( الليله والليله والليله....وكمان الليله ) ، ومحمد رمضان عمل فيلم ( عبده موته وعصابة الأشرار ) ، واحمد السقا هيعمل ( الجزيرة 10 ) ، وكويس اوى ان الشحروره صباح اتوفت عشان تخلص من القر كل شويه عليها وكأنها عايشه من ايام الفراعنه ، وهنفضل نستورد كل حاجه من الصين ، وهيتعرض فى رمضان ( 90 ) مسلسل ده غير المسلسل بتاع عادل امام طبعا ، ومصر هتبقى كلها برامج ( توك شو ) بنفس طقم الأعلاميين بما فيهم هاله سرحان طبعا ، وعالم الفلك والأبراج اسمه ايه ده هيتنبأ بحاجات لذيذه ما بتحصلش وييجى اخر السنة يقولك اللى اتنبأت بيه حصل ويمارس فشر ابو العربى علينا تانى ، وهابى نيو زير بجد .
***
محمد عبدة زيدان
التعليقات