ويفضل سؤال شاغل بال المصريين من ساعة كأس العالم 1990 وجون ( مجدى عبد الغنى ) اللى ذالل اهالينا بيه , هو احنا امتى هنصعد كاس عام بقى...
ويفضل سؤال شاغل بال المصريين من ساعة كأس العالم 1990 وجون ( مجدى عبد الغنى ) اللى ذالل اهالينا بيه , هو احنا امتى هنصعد كاس عام بقى ونشوف رجالتنا بشورتاتهم وفانلتهم وشرابتهم وهى ملعلعة ومشرفين بين الناس المحترمة اللى بتصعد كاس عالم علطول ؟!
طبعا احنا جربنا كل المدربين اللى خلقهم ربنا وبرضه مش نافع معانا , وكأن كاس العالم مكتوب علينا نتفرج عليه على اى قهوة وخلاص ونتحسّر واحنا بنقول والله لو المنتخب بتاعنا كان صعد كان عمل حاجة , ونفضل ناكل فى نفسنا ونحرق فى دمنا على النقطة اللى طلعتنا من كاس العالم زى كل مرة لحد ما النقطة جالها نقطة مننا واتشلّينا , يعنى هو يا جماعة مفيش فى ام البلد دى 11 راجل يصعدوا بفريقنا لكاس العالم ده .
مفيش يا جماعة غير حل واحد بس نلعب بخطة 11 دفاع وتطفيشه , يعنى نفضل نطفش الكورة فى الأوت طول الماتش لحد ما الفريق اللى قدمنا يزهق وينسى اللعب ويسلّم امره لله ونسرق احنا كل الماتشات ان شالله حتى بجون يتيم ولو غلطة حتى او بدربكة قدام الجون واى لعيب من الفرقة التانية يحط الكورة جون فى نفسه , بس لازم ننقى كام لعيب كده يكونوا بيلعبوا كمال اجسام عشان نسد مع الجماعة الأفارقة دول ويا سلام لو يكونوا مدربين على البرود والرخامة والغلاسة عشان يتباردوا على اللعيبة بتوع شمال افريقيا اخواتنا الجزائريين والمغاربة والتوانسة .
اهم حاجة بقى تكون فى الملعب كورة واحده سليمة والباقيين يكونوا مفسيين بحيث لما نطفش الكورة بره وييجى الفريق المنافس عشان يلعب الكورة فيلاقيها مفسّية يروح يجيب غيرها ويلاقيها برضه مفسّيه وعبال ما يجيب الكورة السليمة يكون ضيعله تلات اربع دقايق , ومش هاوصيكم بقى على الاستفزاز .. يعنى نخلى اللعيبة بتاعتنا المحاضرة بتاعتهم قبل الماتش هى ازاى تستفز لعيبة الفريق المنافس وازاى تخرجهم عن شعورهم , احنا عايزين يا جماعة حبة لعيبة يكونوا اساتذه كمان فى التمثيل بحيث الواحد منهم يروح ينكش اى لعيب من الفرقة التانية ويخبط فيه ولو بالغلط يقوم اللعيب بتاعنا يعمل ميت فى الملعب , ولما ربنا يكرمنا ونجيب جون اللعيبة بتاعتنا يناموا عليه وهاتك بقى يا باظات ورا لحد ما نكفّر الفريق المنافس , ويا سلام بقى لو حارس المرمى بتاعنا يترمى على الأرض قد خمس ست دقايق قال يعنى مصاب وبيتعالج .. كده احنا نبقى ميت فل وعشرة ونضمن الفوز واحنا مستريحين بعد ما خلينا الفريق التانى يسب ويلعن ويحلف طلاق تلاته ماهو لاعب كورة تانى .
احنا مش لازمنا مدرب كورة اجنبى كويس ولا حتى مصرى والله , احنا عايزين واحد يكون واخد جايزة ارخم راجل فى مصر .. دحنا حتى ممكن نعمل مسابقة عشان نشوف مين هياخد الجايزة دى وبعدين نخليه يدرب المنتخب على الرخامة وازاى تستموت فى الماتش لحد ما تخلى الفريق التانى يقول حقى برقبتى , وطبعا احنا مش هنسكت على كده .. يعنى الخطة بتاعتنا لصعود كاس العالم مش هتبقى مقتصرة على جوه الملعب بس .. لأ طبعا , لازم تكون فيه خطة تانى بره الملعب بمعنى اننا نرخّم على الفريق التانى فى النومة والأكل والشرب , وياريت بقى لو نعملّهم يوم الماتش وجبة الفطار الصبح فول وطعمية عشان ينزلوا تايهين مش عارفين هما بيلعبوا فى انهى اتجاه , وناخدهم فى رحلة جميلة على الأهرامات ندوّخ ابوهم وقال يعنى بنعمل معاهم الصح وبنفرجهم على اثار البلد زى ما عمل الأهلى كده ما فرقة ريال مدريد لما وصلوا مصر عشان يلعبوا ماتش مع النادى الأهلى .
حد بقى يسألنى ويقولى طب لما نروح احنا عندهم هنعمل ايه ؟! اقوله انا بقى احنا نتبع طريقة الواد الرذل اللى بيشتكى اى حد عمال على بطال زى العيال اللى كانوا معانا فى المدرسة زمان اللى كل شوية تلاقيه رايح على المدرس والناظر عشان يشتكيله من زميله اللى سرق منه القلم ولا اللى ضربة حتى لو كان زميله بيهزر معاه , احنا بقى يا جماعه نعمل زى العيال دى كل شوية نشتكى من حاجه يعنى مره نشتكى من الأكل مرة او نشتكى من شباك الأوضه المخروم يعنى اى تلكيكه وخلاص , وماننساش طبعا قبل كل ماتش نقدم تلاتين اربعين شكوى فى الحكم اللى هيحكم الماتش عشان يخاف ويكش مننا ويعرف اننا عيال رخمه ومش هنجيبها لبر معاه غير لما يهاود ويطلّع عين الفريق التانى انذارات وفاولات عمال على بطال وياريت بقى كمان لو يحسبلنا ضربة جزاء جدعنه فى كل ماتش يبقى كده هو عمل معانا الصح .
وبما ان الأتحاد الأفريقى علطول مستقصدنا وبيحطنا فى مجاميع صعبة يبقى احنا كل شوية نبعت شكاوى فى الأتحاد الأفريقى للفيفا عمال على بطال على حاجات حصلت وحاجات محصلتش عشان نعملهم صداع مزمن يقوم الأتحاد الأفريقى يزهق مننا ويروح حاططنا فى مجموعة سهله اوى عشان يرتاح ويخلص من العيال الزنانة اللى هما احنا , وبكده اقدر اقولك مبروك علينا الصعود لكاس العالم يارجالة ومجدى عبدالغنى بقى يموت بحسرته .
المرة الجاية بقى يا اصدقائى هاشرحلكم خطة ازاى نصعد لدور الـ16 بعد ما نروح كاس العالم طبعا , وربنا يقدرنا على فعل الخير .
***
محمد عبدة زيدان
التعليقات