كنت هموت على نفسى من الضحك وانا بقرا خبر الراجل الطيب بتاع المنوفيه اللى لقى كنز قارون واتبرع بيه لمصر واللى ضحكنى اكتر ان الراجل الطي...
كنت هموت على نفسى من الضحك وانا بقرا خبر الراجل الطيب بتاع المنوفيه اللى لقى كنز قارون واتبرع بيه لمصر واللى ضحكنى اكتر ان الراجل الطيب ده بيطالب الحكومه تديله 10 فى الميه منه .
يا عم الحج هو فيه حد عندنا ممكن يلاقى كنز وبتاع الأخ قارون اللى ربنا خسف بيه الأرض كمان ، طيب ولنفترض ان سيادتك لقيت كنز فعلا ، حد عاقل فى بلدنا دى يتبرع بيه ، طيب وفيه حاجه كمان .. انت لقيت الكنز واتبرعت بيه وقولنا ماشى .. راجل طيب وبيحب بلده اوى اوى ، انت مش خايف على نفسك وانت بتقول عايز 10 فى الميه منه ، يا عم الحج دانت هتدخل فى سين وجيم لحد ما تطلع عينك وهيقولولك فين بقية الكنز ومحدش هيصدق انك اتبرعت بيه كله ، وانت بقى افضل احلفلهم ميت مليون يمين انك مش مخبى حاجه منه وانك راجل بتحب البلد ومش عايز غير حقك فى الكنز وبس ده اذا كان ليك حق اصلا ، يعنى لو حد غيرك كان صرّف الكنز بمعرفته وظبط نفسه وبقى من اغنياء البلد وعلية القوم ، ولو كان بيحب البلد شويه كان عمل مشروع خيرى يفيد بيه الناس الغلابه او حتى كان وزع فلوس ع الفقرا والمساكين صدقه على الكنز ، والله انت راجل طيب اوى يا عم الحج وايدك فرطه ع الأخر بس يارب لما تطلب حقك الشرعى فى الكنز محدش يقولك ( اراك توزع من مال اهلك ) .
بس اقولك على حاجه .. انت والله كده بتثبت للناس ان المنايفه بخير وان كل الكلام اللى بيتقال عليهم غلط مليون فى الميه وانهم ناس جدعان اوى ، اللى نفسى بقى كان يحصل ان يكون الراجل ده من دمياط عشان الواحد ينبهر اكتر ويحس ان الدمايطه مش بخلا زى ما بيقولوا عليهم ( يارب واحد دمياطى يلاقى كنز هو كمان ، اللهم آمين ) ، والله الواحد يا جماعه كل ما يفقد الأمل فى البلد دى وناسها يرجع يقول لأ ( فيها حاجه حلوة .. حاجه حلوة منّا ، حاجه بتخليك تتبت فيها سنه سنه ) على رأى اغنية فيلم عسل اسود بتاع احمد حلمى ، والواحد لما بتحصل حاجه زى دى بتبقى عنيه خلاص هتدمع وايده بتترعش وتبتدى الأغانى الوطنيه تشتغل جنب ودنه والمصريين اهما حيويه وعزم وهمه وكل الحاجات اللذيذه اللى بتلهب المشاعر الوطنيه .
عامة احب اقول حاجه اخيرة للى بالى بالك ( خلّوا عندكوا دم وبطلوا بواخه وغلاسه ع الناس بقى ) وكل كنز وحضراتكم بخير .
***
محمد عبدة زيدان
التعليقات