انت والمرايه !!

فى يوم من ذات الأيام ، وفى لحظة من ذات .. اى لحظة يمكن جاتلك كتير او قليل او حتى ما جاتش خالص ، وانت واقف قدام مرا...

فى يوم من ذات الأيام ، وفى لحظة من ذات .. اى لحظة يمكن جاتلك كتير او قليل او حتى ما جاتش خالص ، وانت واقف قدام مرايتك لأى سبب ما ، وبصيت على نفسك لقيت انك قدام واحد انت تقريبا مش عارفه ، ملامحك هى هى .. بس فيك حاجه غلط انت مش عارفها ، روحت سألت نفسك .. انت مين يا عم ؟! وطبعا مالقيتش رد من الأخ اللى واقف قدامك مش فاهم اى حاجه برضه زيك ، وحسيت ساعتها انك قدام واحد بيستهبل كتير معاك فى حاجات يمكن لو فكرت فيها بعقل ماكنتش اكيد هتعملها ، وعنها يا عم وفضلت تبستف فيه يمين وشمال وهريت شكله تهزيق ، واذا بيك تلاقى وشك اللى ظاهر فى المراية اتغيّر وقلب الوان ، وراح هو كمان يهزق فيك ويبعزق بكرامتك الأرض علشان هو اللى مظلوم معاك بعمايلك ، وقالك دنا ياعم اللى غلبان ومظلوم معاك .. دانت جايبلى التهزيق والمرمطة من غير اى داعى وكل ما تغلط ترميها عليا ، ساعتها بقى هتحس انك عبيط اوى وانت بتكلم وشك التانى فى المرايه وبيتهيألك ان هو بيرد عليك كمان ، وبدال ما ترميها على خيالك فى المرايه وانه هو السبب فى عمايلك السوده ، اقعد مع نفسك وامسك ورقه اخر كل يوم احسن وشوف انت ايه اللى كان مفروض ما تعملوش وعملته وليه انت بتعمل كده وحاول تكون انسان جديد ، ومش اول ما تتزنق تقول ده ابليس وسوسولى خلانى اعمل كده ، ما هو ابليس الله يلعنه دنيا واخره لو ماكنش لقاك عبيط ماكنش ضحك عليك ، وابليس عارف ان اللى جواك اشطر منه مليون مره وبيخترع حاجات هو نفسه بيتعلم منها ، ابليس الله يلعنه بيتعلم الشر من حضرتك وبنات افكاره من حضرتك برضه ، الصح والغلط قدامك وكله باين .. بس حضرتك اللى بتستهبل وبتستسهل الطريق الشمال ، الطريق اللى كله مطبات بس من وجهة نظرك انه طريق مختصر ، واخرتها تلاقى نفسك روحت فى داهيه واتمسكت وانت ماشى مخالف ، بس عارف وقفتك دى قدام المرايه زى العبيط مفيده وصحيه ، لأن العبط احيانا ممكن يفوّق ويخليك تحس انك ماشى عكس الأتجاه .. حتى لو الأتجاه ده كان صح من وجهة نظر الناس الشمال واللى تقريبا كتروا لحد ما خلوا الصح غلط ، واهى الناس دى بقى اللى بجد لازم تقف قدام مرايتهم ويبصوا ويدققوا فى كل حاجه بيعملوها عشان ما يفسدوش غيرهم من الناس العبيطه المسنودين على حيطه مايله ، عامة لسه الطريق قدامك ويادوبك تلحق تختار ، وسيبك بقى من عمايلك اللى تودى فى داهيه ، وبدال ما تبص فى مرايتك وتفضل تبوس فيها زى الأهبل وانت معجب اوى بشكل حضرتك وبتقول ايه الجمال ده وايه القمر ده زى العبيط بجد وزى البنات المهاوييس ، بص فى مرايتك عشان ترجع تحاسب نفسك لأنك لو ما حسبتهاش اكيد فى يوم هترجع تبصلها تلاقيها مشروخه ومتكسره مليون حته وهى فى مكانها ، الحق مرايتك يا صاحبى والحق داوى الكسر والشرخ اللى جواك ، وكل وقفة مراية وانت بخير .

                                 

                                              ***

                                       محمد عبدة زيدان