وانت نايم على السرير سرحان فى الملكوت وهاتك يا خيال واحلام وتطلعات على المستقبل البهيج اللى مستنى حضرتك فضرورى جدا تبص للسقف .. معرفش ...
وانت نايم على السرير سرحان فى الملكوت وهاتك يا خيال واحلام وتطلعات على المستقبل البهيج اللى مستنى حضرتك فضرورى جدا تبص للسقف .. معرفش ليه ؟!وكأن سقف الأوضه بينه وبين الخيال رابط قديم من ايام الأنسان ماكان بنى ادم ، وقبل ما تقول ( هيييييييح ) وتفوق من احلامك الورديه واذا بيك فجأتن تلاقى سقف الأوضه عمّال يلعب ، تقوم ايه يا برنس البرانيس سايب احلامك وخيالك الواسع اللى لسه من شويه مخليك رئيس جمهوريه وتروح مركّز مع السقف اوى ، وتقوم متحول لعبيط اوى اوى اوى ، ولو بصيت ساعتها فى اى مرايه جنبك هتلاقى نفسك حمار وبـ ( ديل ) كمان .. هو فيه حد فى ايامنا دى وفى وطنا اللذيذ ليه نفس يتخيل او يحلم ببكره .
طبيعى جدا سقف الأوضه يلعب يا برنس ما هو شايفك اقرع وزيمباوى شبه يوسف داوود الله يرحمه فى مسرحية الزعيم بتاعت عادل امام ، وانت عمّال تتخيل نفسك اعظم واحد فى العالم ومحقق اكتر من اللى بتحلم بيه ، ده كان لازم سقف الأوضه يلاعبلك حواجبه كمان وهو شايفك فاتح بقك مترين وعمال تلعب فى شعرك زى المهاويس .
يا ابنى يا حبيبى خليك ماشى جنب الحيط احسن .. ده وقت احلام وخيال عبيط ، إحمد ربنا انك لاقى تاكل اصلا ، ولو عايز تتسلّى قزز لب يا اخويا بدال ما تلاقى احلامك قلبت كوابيس بالليل ، وسقف الأوضه بدال ما كان بيلعب هتلاقيه نزل عليك مره واحده كأن زلزال نكشه ، او تلاقى كل حاجه حواليك بتلعب وتبقى نهايتك مستشفى المجانين فى العباسيه جنب الزملا اللى كانوا بيحلموا زيك ، واوعى تسمع اغنية محمد منير بتاعت ( لو بطلنا نحلم نموت ) ، عشان احنا فى ايام وزمن اللى يبطل يحلم فيه يعيش ، وبعدين يعنى هو من حلاوة الأحلام اوى .. طب ما انت كل يوم بتحلم وانت نايم ، خت ايه .. ها ؟! ، ده حتى الأحلام يا اخويا ابيض واسود مفيهاش الوان مع انهم شوف يا اخى مخترعين التليفزيون الملوّن من امتى .. بس انت عارف احنا ملناش فى التكنولجيا طبعا .
طيب يا سيدى ولنفترض انك فضلت تحلم كده عمّال على بطال ، اخرتها ايه يعنى ؟!
، هتحقق حلمك يا غلبان .. طب ازاى تحقق حلمك والنور بيقطع كل شويه ، يعنى يرضيك حلمك اول ما ييجى يتحقق يلاقى النور مقطوع .. هيبقى شكلك ايه قدامه يا منيل .. ده حتى عيب ، يقول عليك ايه الراجل ها ؟! ، طيب وحلمك لو جه وحب يستحمى ولّا يدخل التواليت ولقى الميه مقطوعه .. يعمل ايه ؟! ، هتقوله معلش يا حلم خد كوز ميه اهو وصرّف نفسك لحد الميه ما تيجى ، لم نفسك وسيبك من الخيال وسقف الأوضه اللى بيلعب وركز فى ازاى تجيب تمن سندوتشين الفول .
***
محمد عبدة زيدان
التعليقات