يا ترى البنى ادميين اللى واخدين اللقب ده بالوراثة بس واللى افعالهم تشبه كتير من الحيوانات لو اتسخطوا مش هيكون اريح كتير للبشرية ،...
يا ترى البنى ادميين اللى واخدين اللقب ده بالوراثة بس واللى افعالهم تشبه كتير من الحيوانات لو اتسخطوا مش هيكون اريح كتير للبشرية ، يعنى تعالوا نتخيل العالم من غير بنى أدميين الغدر بيجرى فى دمهم ودم امهم .. بالتأكيد هيكون احسن كتير ، واتخيلوا العالم من غير بنى ادميين بيعشقوا الدمار .. ياااااااااه دى الحياة هتكون زبادى فى الخلاط وكل الشعوب تعيش فى سلام وامان ورفاهيه بلا حدود ، ولا هتلاقى كوارث كل يوم والتانى وناس بتموت كل لحظة واطفال بتتشرد فى بلاد الله بلا مآوى ، ده اللى بيحصل الايام دى ما حصلش فى العصر الحجرى .. ايام ما كان البنى ادم عايش فى الغابات عريان وبيصارع الوحوش والحيوانات المفترسة ، تخيل كده العالم من غير كدابين ولا منافقين ولا رجاله بقرون ولا حريم شمال ،ده الأيام دى الطريق بقى شمال اجبارى والكل بيجرى عشان يبقى زعيم الطريقة الشمالية ، والناس اللى اتسخطت قرود وخنازير زمان ماكنش الحكم عليهم ظالم بالعكس ده كان المفروض القرود والخنازير يرفضوا انضمام هذه الفئة الضالة من البنى ادميين لأنهم ادنى واقل من الحيوانات بكتير ، ايامنا دى المساخيط كتروا اوى وغطوا على الدنيا بحالها لدرجة ان السحاب اشتكى والنجوم نفسها تفارق سمانا ، بس لأن فيه رب اسمه الكريم فهو صابر علينا واحنا من غباوتنا سايقيين فيها ع الأخر وفاكرين انها دايمه ، ياعالم يا نايمة فى البصل فوقوا ده اخرتها متر فى متر يا مساخيط .. قرفتونا وبهدلتونا ، وقال ايه عمالين يخترعوا ويطوروا ويتقدموا فى التكنولوجيا وكل ده علشان مين ، يعنى انتوا بتقدموا للعالم الأرضى اللى ينفعوا وفى نفس ذات اللحظة تدمروا فيه .. طب هتسيبوها لمين فى الأخر وهى كل يوم عماله تخرب اكتر واكتر ، ده الطبيعة لو هاجت علينا مش هتخلى فينا حد وكلنا هتتبعزق كرامتنا يمين وشمال وتحت وفوق .. ده الحيوانات لو كانت بتتكلم كانت رقعت بالصوت من عمايلكم ، ازعجتوا كل شىء فى الدنيا حتى الراقدين تحت التراب ، يعنى معقول يا عالم حتى الكلاب والقطط وباقى الحيوانات والطيور والنباتات والأسماك مش عارفين يعيشوا فى امان وسطينا .. والله دول كمان صعابنين عليا لأنهم مظلومين معانا ، اقول ايه بس ما هو لو كان سيدنا نوح سابهم ساعة الطوفان كانوا زمانهم مرتاحين هما والجنس الغير عاقل ، يا عم يا ابو بدله وكرفته خف شوية مش كده عايزين نعيش الحياة ، نفسى كل العالم يركب عربيات احدث موديل ويلبس احسن لبس وياكل فاكهه كل يوم ويشرب عصير كمان من غير وجع قلب .. عايزين الحياة تتملى شجر وورد ونرش معطر جو فى كل حتة .
محمد عبدة زيدان
التعليقات