مصير الديناصورات

محدش فيكو خطر على باله وهو سارح كده ومفكر انه فليسوف وعالم انه يسأل نفسه سؤال مهم جدا جدا , واللى هو : ليه الديناصورات والكائنات الكبي...

محدش فيكو خطر على باله وهو سارح كده ومفكر انه فليسوف وعالم انه يسأل نفسه سؤال مهم جدا جدا , واللى هو : ليه الديناصورات والكائنات الكبيرة اوى دى اللى بنسمع عنها فى الأساطير انقرضت ,

ممكن يكون حد طلع فلتة زمانه وسال السؤال ده .. لكن طبعا ماعرفش يوصل لسبب مقنع , بس انا بقى يا سيدى لقيت السبب , اكيد اليناصورات الرجالة طبعا اتخنقت من زوجاتهم ومن العيشة ومن كل يوم هنفطر ايه ونتغدى ايه ومن النكد النسائى المعروف فى كل الكائنات اللطيفه المؤنثة , وفى ظل وجود الأزمة الأقتصادية والعيشة اللى بقت زى بيض طائر الرخ ..

كان انقراض الكائنات الضخمة دى اسهل واهون من الأستمرار فى هذه المهزلة , خاصة ان الديناصورات الكيوت يا عينى ماكنوش لاقيين شقة على مقاسهم يسكنوا فيها , وبينى وبينكم هما ماكنوش لاقيين شقق اصلا فى ظل ازمة السكن فى العصر الحجرى واللى لسه مستمرة اللى عصرنا هذا .

ييجى هنا واحد منكم ويسألنى وهو بيتريق سؤال تيييييييت ويقولى : ياعم هو كان على ايامهم فى ازمة سكن ولا اصلا كان فيه على ايامهم شقق من الأساس .. اروح انا بقى رادد عليه بكل ثقة واقوله : يا ابنى مش احنا حضارة 7000 سنة ومن قبل كده كمان , يهز صاحبنا راسة بالايجاب ..

اروح انا اكمل كلامى واقوله خلاص يبقى العصر الحجرى كان بدايته فى مصر بس الحمد لله ما حدش ورثه غيرنا وقريب جدا هنبقى زى الديناصورات وطائر الرخ والفيل الماموث يعنى مصيرنا الأنقراض عشان نكون بترول للأجيال القادمة وده افضل حل لينا , والحمد لله احنا عندنا كل المقومات والظروف اللى عاشوا فيها الديناصورات قبل ما ينقرضوا الله يرحمهم ويبشبش الصخرة اللى تحت راسهم , يعنى ازمة سكن .. موجود , اقتصاد وعيشه بييييض ..

موجود , نسوان بتعشق النكد .. موجود , مسلسلات مصرية تفقع المرارة .. موجود , بنات مسهوكة دايبين فى مهند التركى وامثاله .. موجود , سياسة لوووووز تفرح القلب الحزين .. موجود , مطب قدام كل بيت .. موجود , واللى يسهل مهمتك فى الأنقراض السريع وجود الفول ليل ونهار زى الحياة والموت والجواز , يبقى ايه اللى ناقص تانى عشان يبقى مصيرنا نفس مصير الديناصورات , اظن كده احنا من حقنا الأنقراض السريع ووضع جثثنا فى اكبر متاحف العالم علشان الناس تاخد عبرة من الحياة .. وعلى رأى عمو فؤاد المهندس الله يرحمه : مش كده ولا ايييييييييييه . 

اقرأ ايضا : سبايدر مان وزن الفيل

***

محمد عبدة زيدان