لكل الناس الزهقانين القرفانين من تعب الدنيا وجعها واللى من كتر اليأس نفسهم ينتقلوا الى الناحية التانية اللى هى ( الاخرة ) يعنى , طب ...
لكل الناس الزهقانين القرفانين من تعب الدنيا وجعها واللى من كتر اليأس نفسهم ينتقلوا الى الناحية التانية اللى هى ( الاخرة ) يعنى , طب حضرتك ياعم الزهقان القرفان الطهقان المدايق انت متأكد يعنى انك عملت كل حاجة تخليك عايش فى الناحية التانية مزاجك عنب , ولا هتروح هناك وتكسفنا زى عوايدك وتضطر بقى تتمنى انك ترجع لينا تانى وانت ايد ورا وايد قدام ..
بس خد بالك السكة دى يا عم الزهقان مفيهاش اختيارات يعنى كلها اجبارى , ومهما كانت الدنيا صعبة او حتى مستحيلة فانت فيها برضه مدلع لأن الأخرة يا حبيبى مفيهاش دلع يعنى هيطلع عنيك على كل كبيرة وصغيره عملتها , وكمان فيه حاجة تانية انت مش واخد بالك منها .. وانت فى كامل قواك العقلية هتقدر تهون عليك نفسك وهتقدر تسلم روحك لهادم اللذات ؟!
لا طبعا مش هتقدر والدليل على كده انك لحظة ما بتحس بأى خطر على نفسك بتنفد بجلدك علطول زى اجدع جبان , يعنى فى عز ما انت زهقان ويأسان لو صادفت عربية وخلاص هتقضى عليك عن طريق الغلط هتلاقيك بتجرى زى الفار والخوف مالى عنيك وخالع قلبك , يبقى اذن يا حبيبى انت مش قد الكلام ولا قد افكارك السودا , انت يا ابنى اضعف واقل من انك تسيب الدنيا بسهوله كده وبإرادتك .
طبعا دلوقتى انت جه فـ بالك سؤال مهم ونفسك تسأله عشان تبين ان كلامى فيه حاجة غلط , والسؤال هو : عن الناس اللى بتنتحر عادى وبتهون عليهم نفسهم دول ايه وضعهم ؟!
اقولك يا حبيبى بالنسبة للناس دول اكيد عقولهم فى لحظة الأنتحار ماكنتش فى وضعية سليمة .. يعنى اتحركت من مكانها وراحت لمنظقة الخلل النفسى , وفى اماكن الخلل ماتلومش حد على اى حاجة بيعملها .
الأفضل ليك ولكل حد عند مشكلتك انه يحاول يطلع من الدنيا بأقل الخساير علشان يعرف يعيش فى الناحية التانية فى وضعية على الأقل افضل من اللى كان فيها هنا , بدال ما يفضل يسب ويلعن ويسخط على كل حاجة حواليه وهو واقف مكانه ما بيتحركش , ما تفضلش شاغل نفسك انك عايز تروح هناك وخلاص محدش هيطبطب عليك هناك لو روحت بشوال ذنوب وكمان زهقان وقرفان ومدايق ويأسان .. انت على كده هتبقى بتحجز مكانك مقدما فى برزخ المعذبين دنيا واخرة .
***
محمد عبدة زيدان
التعليقات