الناس اللي عنيها بتندب رصاصة فـ خيرك وتبحلق فيك بعنين شياطين بتطق شرار ولا بتسمّي عليك وتكبّر دي قلوبها مهيش من طين ...
الناس اللي عنيها بتندب
رصاصة فـ خيرك
وتبحلق فيك بعنين شياطين
بتطق شرار
بتطق شرار
ولا بتسمّي عليك وتكبّر
دي قلوبها مهيش من طين
ولا حتى محصّلة نار
دي قلوب ملهاش ولا دين
أهى ناس حاسدين ولا آمنوا
ولا هما من الكُفّار
دي قلوب جنبيها الطوب
ولا يفرقهم منظار
والطوب لو آخره جدار
دي آخرها ما تعرف فين
الناس دي تشوفها بعين
عينهم تعمي العينتين
قول يا ستار يا معين
يحرقهم بيك ويجيرك
وبذكر الله بضميرك
وبتسليمك تفسيرك
للي فإيده الأسرار
وما تعجزهوش أسحار
العاجز حاسد حاجز
روحه فـ سكة أخطار
محجوز وشبابه عجوز
وان شب يطبِّ إنهار
مسكون بفصيل أشرار
حبّينه حاببهم عاشقين
ولا هما من الأحياء
ولا حتى الميتين
دول ملعونين ولا تسأل
ولا يعطف يوم تفكيرك
بالناس اللي عنيها بتندب
رصاصة فـ خيرك
وانت اللي يدوبك لو تإذي
تاكل نفسك قلمين
فـَ منين ببرائتك تقدر
تعرف لما هتتفكّر
سر القلب اللي معمّر
بإيدين إبليسه خرابه
روح سمي الله روح كبّر
ربّك واسكن على بابه
ده ما يحسدش الإنسان
غير نفسه واعز احبابه
والخير لو مِـ الوجدان
الكلب ينجّي المومِس
والشر ان صابك سهمه ؛
ما اتساهموا الناس رموا يونِس !
ربك رب الأقدار
سلّم وانت هتختار
ولا راح يحتار تسييرك
ويقف ضد لتخييرك
قدّم عيش جبر مصيرك
وانت الحر فـ تأخيرك
سلّم حر ومتلجّم
ربك موجود من غيرك
والناس اللي عنيها بتندب
رصاصة فـ خيرك
آهي آية يا تنكر يا تفسّر
نظرة بقدرة فـ تدميرك
_____
محمد مرشد
التعليقات