أحلى صورة صورتك انتِ زى ما انتِ من زمان لسه أجمل صورة إنتِ لحد ما يؤون الأوان ما انصفكش ان قلت لك زى الملايكة كيف يقول...
أحلى صورة صورتك انتِ
زى ما انتِ من زمان
لسه أجمل صورة إنتِ
لحد ما يؤون الأوان
ما انصفكش ان قلت لك زى الملايكة
كيف يقولوا انك لبستي توب شيطان
***
أحلى توب في الدنيا توبك
وانتِ من جوايا حوا
دايبة دوب دايب في دوبك
شادة روحي بكل قوة
لو في مرة خلعتي توبك
واتبدلتي فـ توب ملاك
عيبي أنا راح يعيبك
راح ياخدنا للهلاك
ده انتِ من جوايا دمي
تكمليني أكملك
بنتي وامي كل همي
إيه في دنيتي يبدلك
***
أحلى صورة صورتك انتِ
وانتِ من حواليه أنثى
من هواكي تسير سفينتي
والتقيكي فـ شطي مرسَى
والتقيتك جنب مني
ضلتي شمسي هوايا
لو بكيت يوم غصب عني
تمسحي دمعة بكايا
كل غربة تهون معاكي
حتى لو صحرا جفاف
تتبدل جنبه بلقاكي
عمري وانا جنبك ما اخاف
***
أحلى من كل الأماني
وانتِ من قدامي مرأة
من عنيكي أشوف كياني
ألمح اللحظة اللي طارئة
ألمحك من بين وجودي
محوّطاني بالأمان
زى زرع بتسقي عودي
عطف ومحبة وحنان
***
كدابين لو قالوا عنك
جوه منك فيه طوفان
لو يهيج يقلع يدمر
يتمحي خط الأمان
كدابين لو يوم قالوا لك
تقسمي معايا المكان
والوفاق اللي جمعنا
يتبدل قتال بنان
كدابين لو يوم قالوا لك
تلبسي توب الشيطان
تخرمي قعر السفينة
لجل تبقي القبطان
***
كدبهم مردود عليهم
ألف مرة بميت لسان
جوه منك نبع صافي
عبر مشوار الزمان
من تاريخ ما أبويا وامك
طلعوا من بره الجِنان
ولسه فاضل نبع صافي
لحد ما يؤون الأوان
ولسه أجمل صورة إنتِ
زى ما انتِ تنقصي
لو يوم لبستي توب ملايكة وتنتهي
لو يوم لبستي توب شيطان
***
أ/ علي نظير هويدي
التعليقات