سافرت فـ رحلة جوايا أغوص في النفس من جوه ياخدني ميولي وهوايا ما ين الضعف والقوة أشوف تكويني في سنيني وأعرف ذاتي مين هو...
سافرت فـ رحلة جوايا
أغوص في النفس من جوه
ياخدني ميولي وهوايا
ما ين الضعف والقوة
أشوف تكويني في سنيني
وأعرف ذاتي مين هو
لاقيت عاري شراع صاري
ومقداري جبل عالي
وبين عاري ومقداري
هويت وسبحت في الهوة
***
لاقيت خوفي لبس جوفي
في كيس مطاط ما بيطقّش
في وسط حيائي وكسوفي
لسان رطاط ما بيفضش
وعيني العمية مفتوحة
وغير الغش ما تحقش
وضحكة فـ وشي مشبوحة
بيتودد ولا تودش
***
وشفت ضميري متزفزف
واخد نزلة وعنده زكام
وقاعد وحده في آخر
بيتأخر مع الأيام
وعند ما ييجي يتكلم
بيتخبط الكلام برغام
تموت الكلمة مخنوقة
وتفضل حشرجة فـ صوته
يشوف البسمة مسروقة
ويكره ضعفه وسكوته
يحاول يصحى من نومه
ويتعكز بنبوته
يهز البرد أوصاله
ويفتكر اللي يجرى له
ويرجع تاني يتلفلف
ويدخل فرشته وينام
***
وشفت فـ جوعي موضوعي
وصبري قصر ديل يا ازعر
أليفي ذلي وخضوعي
أليفي لطمة العسكر
أليفي سجني جوايا
رضايا بالهوان أوعر
أليفي غربتي فـ داري
شعاري في النفاق أكبر
ده لو سجاني غاب عني
اروح له لحده أتشكر
وأترجاه عشان يرجع
أبوس يده عشان يظهر
أزين لسع كرباجه
واصمم يده تتعطر
يشاور قبل ما يشاور
ألبي بكل ما أقدر
بدم أخويا أتوضى
واصلي باسمه وأكبر
***
وشفت آمالي إهمالي
مدوبها في جنح الليل
وكتّف كسلي أحلامي
وغرقها في بير الويل
رضايا ما يبتسم لبني
وجبري كل شىء يا ابني
وقوتي لفها جبني
وعيشني شبابي هزيل
سمعت ضميري بينادي
وبيقول لي يا واد غلطان
بتنكر مبدأي الهادي
وتتحيز مع الشيطان
ده انا اللي النيل حليف جدي
ده انا اللي باعيش عشان ادي
ده انا اللي بود وفـ ودي
مفيش نِدِّى ده انا الإنسان
***
أنا أول يد شافها النيل
تروض طيشه وجموحه
وخليته سبيل بيسيل
ويحيي الأرض من روحه
***
أنا ابن النيل انا زيه
ورثت طباعه وصفاته
جودي في الزمان ضيه
وكوني في الورى حياته
وطبع النيل رزين هادي
كريم اليد جاره دار
يبدل في الجمال نادي
وجوه الليل يخلي نهار
ولو كان طبعه متهور
حيتحول في يوم لبخار
ولاجل الدنيا تبقى عمار
لازم يفضل رزين هادي
وانا ابن الدلتا والوادي
شبيه القلب في الإنسان
أضخ الدم في الشريان
أشع على الحضارة النور
يبين حسنها المستور
ولما الغير عليها يجور
يكون مغرور أكون هادي
***
أطول بالي وأسامح
وقلبي بالإيمان زاخر
ولو كان الحصان جامح
أسيب الحبل للآخر
واسجل شكل وملامح
غروره بنكتة للساخر
***
وأما ان كان طوفان جارف
أنا وحدي اللي باتصداه
وبإْيماني أكون عارف
منين صده وهو قواه
وامحي وجوده وأصلي
صلاة شكر وخشوع لله
ده انا المأمون أصون الدين
وأعدل كفة الموازين
وأول مضغة فيها حياة
بتتكون في جسم جنين
وآخر حس في الدنيا
وأبعادها يكون له رنين
أنا إدريس أنا عيسى
أنا محمد عزيز وأمين
أنا الإنسان
أنا المصري
***
أ/ علي نظير هويدي
التعليقات