تيجي نحلم يا حبيبتي أحلام عاشق سعيد نرجع آدم وحوا للعالم من جديد لو مرة الخوف ضايقنا ولا الإعصار خنقنا حنقول له خل...
تيجي نحلم يا حبيبتي
أحلام عاشق سعيد
نرجع آدم وحوا
للعالم من جديد
لو مرة الخوف ضايقنا
ولا الإعصار خنقنا
حنقول له خلاص نطقنا
وحلمنا بشىء مفيد
تيجي نحلم يا حبيبتي
أحلام عاشق سعيد
***
تيجي نحلم بالصراحة
في الكلمة وبالوضوح
ولا نحشرش الوقاحة
جوه آمال الطموح
وتفيض ريحة القباحة
من بين الناس تفوح
تتعزز بالوفاق
لَمَا توب الحق ضاق
خلعوه ورموه بعيد
تيجي نحلم يا حبيبتي
أحلام عاشق سعيد
***
تيجي نحلم بالأمانة
ونوفّي بالعهود
ونقيم حق الديانة
عند جميع الحدود
ولا تفضلش الخيانة
محميّة بالبارود
ناصبة شراك الخداع
قاطعة لسان الدفاع
من يوم ما الحق ضاع
ماخدتش بإيده إيد
تيجي نحلم يا حبيبتي
أحلام عاشق سعيد
***
نحلم بالكلمة حُرة
وبحرية رغيف
ولافيش غصة ومُرة
تسكن حلق الضعيف
ولا سافل في العلالي
يلبس تاج الشريف
ويدوس الكل جاره
من غطرسة انبهاره
والناس منه استجاروا
جروهم في الحديد
تيجي نحلم يا حبيبتي
أحلام عاشق سعيد
***
تيجي نحلم بالسعادة
مرسومة فـ كل دار
وحلاوة لابتسامة
غطت وش النهار
ولافيش أطفال حزينة
متباعة للدمار
بيعاها إيدين خفية
موجودة للأذية
شاردة مِـ الإنسانية
وارثة بيع العبيد
تيجي نحلم يا حبيبتي
أحلام عاشق سعيد
***
تيجي نحلم بالعدالة
من فوق الناس تدور
ولافيش واحد بعينه
على كل الناس يجور
وقانون عاجز وعاطل
محبوس جوه السطور
محبوس زى اللي سارق
وكإنه غريب مفارق
وصحاب البيت طوارق
قاطعين حبل الوريد
تيجي نحلم يا حبيبتي
أحلام عاشق سعيد
***
تيجي نحلم بالتساوي
في الواجب والحقوق
وقرار الأغلبية
جوه المجلس يفوق
ولافيش فيتو يرده
ويدخله في الشقوق
ويمد العنصرية
ويهد الإنسانية
ويبات البلطجية
في العالم من جديد
تيجي نحلم يا حبيبتي
أحلام عاشق سعيد
***
أ/ علي نظير هويدي
التعليقات