من جوه راسي ألف هل ولأى هل ما شفت حل واتلم حواليّه الهلول والهلهلة مع كل هل سؤال وعشرين مسألة وخدوني بره البيت وطل...
من جوه راسي ألف هل
ولأى هل ما شفت حل
واتلم حواليّه الهلول والهلهلة
مع كل هل سؤال
وعشرين مسألة
وخدوني بره البيت
وطلعوا في الخلا
وتحوّطوني لحد ما عنيّه تشوف
خالعين براقع الاستحا
طردوا الكسوف
هتفوا بسقوطي
هيّصوا دقّوا الدفوف
هزّولي راسي
زى هز الغربلة
وفضلت افكر
لحد ما التفكير تِشَل
مالاقتش حل
***
هل الهلال وسألني هل
شفنا العطاء ظالم وضل
ولا العطاء طول السنين
علي الجبين أكرم .. أجل
طب ليه بنتعمّد إهانته نهملوه
من جوه دهاليز المغارة نسجنوه
لو مر يوم الضوء قصاده تمنعوه
***
عَ الضى من وسط الشقوق بعنيه يطل
ليه اللي عاش العمر سابق بالعطا
لا فـ يوم تِأخّر عن عطائه ولا بطا
نحكم عليه ينزل لحد المرمطة
ولحد حقه تمللي تحصل لخبطة
ويروح نصيبه لغيره من تحت الغطا
لوقال ده حقي ردّي دي سلبطة
مجنون وكل كلامه هتش وهلفطة
حتى حروف إسمه عبيطة وشخبطة
أما اللي فاته وعاش حياته شعبطة
على كتف غيره وكان نصيره سفسطة
نلاقيه تملّي ركب موجات المغمطة
وقطع لسان سيده ونديده جليطة
حكمه وشكمة كتم هواه وذله ذل
مالاقتش حل
***
وفضلت ابحلق جوه هلات الهلول
قال ما تستعجلش حاضرب لك مثال
شاور على الكابتن عماد أحمد كمال
خَد خطوتين وطلع لي من قلب الطابور
طيار وطاير في السما بين النسور
ولأنه كان طيار جسور يوم العبور
شهدت قيادته على كفائته وهمته
قد الكفائة كلفوه بمهمته
كانت مهمة بتتوصف بالإنتحار
والشرط فيها تتقبل بالإختيار
ولأن روح العزم فيه كانت شعار
نفّذ بنودها حرف حرف وباقتدار
صوب حدف نسف الهدف خلاه دمار
خلا قيادات العدو جالها انهيار
وجميع كلاب الغطرسة صابها السعار
صواريخ مدافع طيارات ضربت عليه
وصابوه ولكن رغمها ماقدروش عليه
ورجع مضحي بركبته وعين من عنيه
وبقلبه يدعي للوطن بالإنتصار
وتراب بلدنا وقتها أطيق عليه
رمز البطولة بكل إعزاز وافتخار
وبدال ما نفضل باحترام ننظر إليه
عيشة زمايله بعدها كترت عليه
وقيمته رخصت عندنا ماعرفش ليه
وقيمته تِساوت عندنا مع كام جنيه
ورقم في كارت مسمينه أبونيه
بنص أجرة درجة تانية بالقطار
ركب في أولى قال له قوم وراجع ورا
ده الكرسي ده إللي بيقطع تذكرة
رجع ماشافش اللي لابِدله في الدرة
الكمسري بيغرّمه ما قطعشي من الشباك
إزاى يا سيدنا الكمسري قال تعليمات
حقه تراجع عندها وتعل .. مات
حقي عليه دلوقتي يدفع من سكات
ويا إما يقطع تذكرة أو غرامة
إما الإهانة وفي المحطة اسلّمه
للشرطة رايحة تنبهه وتعلمه
أول ما ينوي على السفر
من غير ضجر يبات وشايل
تحت راسه التذكرة
***
ولقيت زميله في الدراسه ودفعته
واللي ما جادش بعينه ولا بركبته
طلع التدرج لما وصلت رتبته
في الجيش لوا وفي المجالس مستشار
وسألت نفسي مين اللي بادر بالقرار
مين اللي قال إن الرموز ترجع ورا
يمكن يكون حضرة جناب المستشار
يمكن أوامر سيدي الباشا اللوا
يمكن يكون هلفوت أو حتة حمار
بس المؤكد إنه مربوط في الدوبار
إللي صوابع هرتزل محركاه
في البرلمان .. جوه الديوان ..
خلف الستار
***
أ/ علي نظير هويدي
التعليقات