عمري الطويل انسحب من تحت رجليّه والقوة راحت وما فضلشِ سمع ولا شوف ورجعت ادوّر جواى وحواليه مالاقتش جوايا عايش حى غير الخوف خاي...
عمري الطويل انسحب من تحت رجليّه
والقوة راحت وما فضلشِ سمع ولا شوف
ورجعت ادوّر جواى وحواليه
مالاقتش جوايا عايش حى غير الخوف
خايف من الضى لو يكشف سبب خوفي
خايف من الغى خايف مني على خوفي
خايف من الهم صفى الدم من جوفي
خايف اقول ليتكسر في قلبي الخوف
***
خايف من الضلمة خايف من سواد الليل
خايف من البرد في حصار المطر والسيل
خايف ليجرفني تدهسني سنابك خيل
خايف من الفجر لو شقشق مازاعش أدان
خايف من الصبح لو يصبح مافيهش أمان
خايف من الأم ماتضمّش وليدها حنان
خايف من الضهر لو ضهري ما يسندنيش
خايف في ساعة عطش مالقيش نصيب في النيل
***
خايف من البحر لو يوم انسجر موجه
خايف من العلم شايل سم في دروجه
خايف يموت الشجر نخله وجميزه
خايف من الأرض لو حبلت من السرطان
خايف من الزرع لو يرضع غثى الغثيان
خايف من النسمة تتنفس هذى الهذيان
خايف من الجوع ليحش الضلوع سيفه
راكب حصان وجاى يرمح في كل مكان
***
خايف من اللي انعوج خايف من المقلوب
الندل بقى عدل متسلط على المغلوب
شاهر سيوفه وبيقطّع من المصلوب
ومأيد البطش في إبادة أمم وعشوب
طلع منادي ينادي إن السِفاح مطلوب
كتّر عبيد الغريزة وكبر الخاينين
إفتح بيبان الإباحة ودخل الباقيين
إقلع رداء الأمانة والشرف والدين
لازم نحاكم بهية وينجلد أيوب
***
خايف من الشمس لو غربت في بستاني
زغلوله يسقط ويفرط طرح رماني
كان نفسي اخالف واروح حالف ما اعيش تاني
واحس بالقوة ترجع جوفي من تاني
واحس بالضى راح جاى في النني
واشوف اخويا مسك إيدي يطمني
لكن لساني عصاني وانخرس مني
وحفرت قبري وانا مسيطر عليّه الخوف
***
أ/ علي نظير هويدي
التعليقات