كول تون يا بيه

الكول تون وسنين الكول تون ، الله يخربيتكوا يا بعدا .. هو الواحد مكتوب عليه الشقا فى البلد دى ليه ؟! يعنى ايه كل شركات المحمول غصبا عن...

الكول تون وسنين الكول تون ، الله يخربيتكوا يا بعدا .. هو الواحد مكتوب عليه الشقا فى البلد دى ليه ؟! يعنى ايه كل شركات المحمول غصبا عن عينك كل شهر تدفّعك رسوم كول تون انت مش عايزه سواء دوست نجمه برضاك او غلطت ودوستها وانت بتتصل بحد ، ده يا راجل فى مره من المرات باتصل بواحد صاحبى مسيحى على خط كان لسه جايبه جديد وخاص جدا ، لقيته حاطط كول تون للشيخ الشعرواى ، انا استغربت بصراحه وقلت فى عقل بالى لما هو اسلم اومال ما قالش ليه ، وطلع فى الأخر ميعرفش حاجه عن موضوع الكول تون ده .

ولا كله والراجل الكبير المحترم اللى لقيته حاطط كول تون لعمرو دياب ، انا قلت الراجل باظ على كبر ولا ايه ، ده ما بيحبش يسمع غير عبد الوهاب وام كلثوم .. وحتى عبد الحليم حافظ بالنسباله شباب وما بيسمعوش خالص ، وبرضه طلع فى الاخر مظلوم وما يعرفش اى ابن تيييت عن كول تون عمرو دياب وتقريبا كده ما يعرفش مين عمرو دياب اصلا .

واللى زاد وغطى كمان صاحبنا الأخوانى اللى لقيت عنده كول تون تسلم الأيادى اللى كل السيساويه بيحبوها واللى الأخوان يطيقوا العمى ولا يطيقوش الأغنيه دى بالذات لأنها بتفكرهم بحاجات مش ظريفه بالنسبالهم ، وبمجرد ما عرف غيّرها علطووول .. لكن يا عينى ما لحقش يتهنى براحة البال كتير وراحت الشركة باعتاله كول تون بشرة خير بتاعت الجسمى ، طب يعمل ايه الراجل .. واصحابه فى التنظيم هيقولوا عليه ايه !! ما هو لازم برضه الراجل يبقى عنده انتماء ، ولو حتى بالكول تون يا اخوانا .

ولا الأمام بتاع الجامع اللى جنبنا اللى كله تقوى وايمان ، عارفين الكول تون بتاعه كان ايه ؟! .. كانة اغنية مهرجان بتاعت اوكا واورتيجا ، طب الناس تصدقه ازاى بعد كده لما يحب يوعظهم ويكلمهم فى الدين ، هيقولوا عليه ده شيخ على ما تفرج ، ولولا ان انا عارف مواضيع الكول تون البايخه دى كنت ظنيت فيه ظن مش كويس خالص .

يا عالم يا بتوع شركات المحمول اختشوا مش كده ، هو الكول تون بالعافيه يا ولاد التيييت ، ولّا انتوا عاملين زى البياعين اللى فى المترو والقطر .. ماشيين تقولوا ( كول تون يا بيه ، كول تون يا بيه ) ، واخدين مبدأ المثل الرخم اللى بيقول ( الزن على الودان امر من السحر ) ، ارحمونا بقى مش كفايه انكوا حراميه وبتسرقونا عينى عينك وساكتين كمان عايزين تسموعونا حاجات ملهاش اى ستين لازمه انها تتسمع .. الرحمه حلوه برضه .

                                     اقرا ايضا : الضحك للجميع

                                              ***

                                      محمد عبدة زيدان