انتوا عارفين ليه احنا فشخنا العالم انبهار ؟! لأننا قدرنا نغوص فى اعماق الأنتخه وقدرنا نتفوق على الزول السودانى فى اكتر حاجه هو متم...
لأننا قدرنا نغوص فى اعماق الأنتخه وقدرنا نتفوق على الزول السودانى فى اكتر حاجه هو متميز فيها وقريب جدا هنقدر نصعد لكاس العالم اللى بقالنا 24 سنة هنبيض وندخله .. يعنى هى السنغال ولا غانا احسن مننا فى ايه ، ما هما بقالهم سنين مأنتخين وبيصعدوا على قفانا .. يسيبونا بقى ناخد فرصتنا .
ما هو مش معقول بصراحه نكون موجودين فى اكتر قارة مأنتخه فى العالم وما نتعلمش نكون ناس مأنتخين بضمير ، ده اخواتنا فى السودان سبقونا بمراحل والجنية بتاعهم بقى اغلى من الجنية بتاعنا من بعد ماكان بيتعبى فى شوايل من كتر ما كان رخيص .
لازم يا جماعة نحول الأنتخه من حاجه مسلّية لأتجاه قومى ، آن الأوان بقى نبقى ملوك الأنتخه .. عشان نلاقى الحياة بقت موز باللبن وكل مواطن ياخد كوباية كل يوم ، ما احنا مش هنفضل كده فاشلين فى كل حاجة لازم برضه نقفش حاجة ونتميز فيها زى بقية خلق الله .
الأفكار كتير حوالينا بس اللى يركز ، يعنى عندنا ما شاء الله برامج الطبخ بقت زى الرز ودى حاجه هتنفعنا اوى فى موضوع الأنتخه ده ، احنا بس ما علينا الا اننا ناكل وننام ونتغطى كويس وربنا هيكرمنا اخر كرم ، وكمان ياريت اى حد هيشترى هدوم بعد كدة ما يجيبش اى حاجة ليها عدله وقلبه عشان ما يتعبش فى القلع واللبس ، ويفضل فى موضوع الهدوم ده اننا نتجه للبس الجلاليب البلدى رجاله وستات ، ويستحسن كمان تكون لون واحد عشان ما نتعبش اخواتنا الصينين فى التصنيع .
بعد ما ننجح فى تحويل الأنتخه الى اتجاه قومى واسلوب حياة لشعبنا اللذيذ المحترم اللى بيسمع الكلام زى الأطفال الشطار ، نبتدى بقى نرميها على الشعوب الأخرى ونعمل فيها مكسحين علشان يصرفوا علينا هما بقى واهو كله بثوابه ، واهل الخير كتير والله وهترزق ما تقلقوش .
عندنا امثال شعبيه جميله المفروض نرجع لها ونهتم اننا نسمعها وننفذها صح .. يعنى فى مثل شعبى مهم جدا قالوه اجدادنا المأنتخين ( اصرف ما فى الجيب يأتيك ما فى الغيب ) ، وفى مثل جميل تانى ( ما حدش بيبات من غير عشا ) ، يعنى مهما حصل هنتعشا برضه ومش هنموت من الجوع زى ما قالوا فى المثل الشعبى العظيم .
ياريت بقى اعلانات ادوية التخسيس تختفى من حياتنا عشان كلنا نبقى حجم واحد كلنا ( اكس اكس اكس لارج ) ، مش عايزين حاجه تعطلنا يا جماعه عن مشروع الأنتخه القومى واللى لازم نبقى فيه احسن شعب فى العالم .
***
محمد عبدة زيدان
التعليقات