اكتر حاجة يتميز بها الكائن العجيب المسمى بـ (سواق التوكتوك ) , انه يكون مسقط بنطلونه وعامل شعره خواتم ويمتلك سى دى عالى الصوت فى المكنه...
اكتر حاجة يتميز بها الكائن العجيب المسمى بـ (سواق التوكتوك ) , انه يكون مسقط بنطلونه وعامل شعره خواتم ويمتلك سى دى عالى الصوت فى المكنه بتاعته المعروفه بأسم ( التوكتوك ) , وطبعا لازم وهو ماشى بالمكنة بتاعته يكون مشغل اغنية شعبى ومعلى الصوت على اخر مستوى بحيث يسمعه سكان المحافظات والمدن والقرى المجاورة , والكائن ده يا حضرات غالبا بيكون عمره ما بين ال14 سنه الى اوائل العشرينات , وطبعا نادر جدا ما بتلاقيه بيدرس فى كلية لأنه بيبقى شايف ان التعليم فى مصر اقل بكتير من مستوى ذكائه والروشنة اللى عايش فيها فيبكتفى بالدبلوم ويبوس ايده وش وضهر وشعر ودقن عليه كمان , واهم حاجة بيهتم بيها تظبيط المكنة بتاعته والترويش عليها بالسى دى الجامد والفلاشة الغرقانة بالأغانى الشعبية الجامدة والعلم بتاع اى فرقة كورة عالمية اللى بيتلزق فى سقف المكنة والستارة الفخمة اللى بيعلقها على الجناب عشان لما تركب معاها الحته بتاعته ( الموزة يعنى ) محدش يعرف مين هى , وحكاية الحتة بتاعته دى موال تانى .. ماهو مش راكب المكنة وصارف عليها عشان اكل العيش والكلام الفاضى دة , ده المهمه الأولى والأخيرة ان يعرف يظبط حتة بت تكون من الأخر .. يعنى حاجة كده تكون فى الأعدادى او حتى معاه فى نفس الدبلوم , المهم انه يكون ظابط الكلام وعايش دور الرومانسى ومفكر نفسه احمد السقا النجم اللى كل البنات دايبة فى غرامه وبتتخانق عليه , الكائن ده يا حضرات مكانه مش هنا طبعا .. ده المفروض يعيش فى حتة تانية خالص , والكائن ده هتلاقى مثله الأعلى فى الحياة هو عبدة موته واللى صوره مغرقة الأوضه عنده .. ولو عايز تعرفه اكتر هتلاقيه عامل اكونت على الفيس بوك بأسم ( الفخم , الروش , الأصلى .... ) واسماء تانية كتير تدل على ان صاحبها مش بنى ادم عادى زيينا , وكمان هتلاقية كاتبله على ضهر المكنة اى جملة من اختراع الفئة المختلفة عن كل الناس .. يعنى مثلا هتلاقى جملة ( لو الشقاوة رتب كان زمانى بقيت لواء ) او ( الفخم ) او ( بنزين فى التنك ولا حساب فى البنك ) او ( اخرة الشقاوة عيش وحلاوة )
, وكلام كتير لسه مستوى تفكيرنا مقدرش يوصل له , والكائن التوكتوكى دة فى تطور مستمر .. فهو يمتلك ايضا موضه خاصة بيه ويقوم بتحديثها من حين الى اخر .. واكتر ناس بيحب يقلدهم فى طريقة اللبس هما نجوم المهرجانات الشعبية , وبكل امانة لازم الواحد يقول اللى ليه واللى عليه .. يعنى هو برضه بيشترك مع فئات اخرى من البنى ادميين المصريين فى بعض الصفات , على سبيل المثال وليس الحصر لازم يكون متصاحب على شلة يشربوا مع بعض السيجارتين اللذاذ فى مكنة تكون امان ومفيش مانع لو كان بيرفع ( ربع ترامادول ) علشان يعرف الزميل يتعامل مع البشر , انا عن نفسى مقدر دماغه وحاسس بوجوده وسطينا ولازم كلنا نقدر انه كائن مختلف علشان هو واللى شبهه دول مستقبل مصر .. اه يانا ياما .
***
***
محمد عبدة زيدان
التعليقات