يعنى كل حاجة ماشية بالإكرامية فى بلدنا وقلنا ماشى هنعمل إيه قدرنا ونصيبنا واهو كلنا بنساعد بعض ، لكن اللى مش قادر است...
يعنى كل حاجة ماشية بالإكرامية فى بلدنا وقلنا ماشى هنعمل إيه قدرنا ونصيبنا واهو كلنا بنساعد بعض ، لكن اللى مش قادر استوعبه ازاى ادخل تواليت مطار القاهرة وانا خايف .. علشان مش معايا فكه اديها للبيه عامل النضافة اللى واقف على باب التواليت.
اخر مرة من حوالى شهر وانا راجع من تركيا كان نفسى ادخل التواليت .. لكن خوفت بصراحة ، لأن المرة اللى قبلها وانا راجع من الصين .. البيه عامل النضافة وصلّنى لحد باب التواليت الداخلى ، وفضل يتكلم عن المجهود الجبار المبذول من سيادته فى تنضيف التواليت ، ونصحنى انى ادخل التواليت ده بالذات ، وطبعا كل ده مش كرامة لعيون حضرتى ولا علشان حضرته حس انى شخصية مرموقة فى هذا الوطن اللذيذ ، لكن علشان البقشيش يطلع منى بضمير مسترّيح ، وبعد ما سابنى حضرته لدقايق امارس حقى كمواطن وكمسافر فى استخدام التواليت الملكى ، خرجت لقيته مستنى على بعد خطوات من التواليت ، ضربت إيدى فى جيبى وطلعت العملة المصرية اللذيذة وانا بادعى الاقى فئة الخمسه جنيه لسه عايشة معايا .. علشان اديها للبيه اللى عنيه فرزت الفلوس قبل انا حتى ما اعرف إيه اللى طلع فى ايدى ، ومن هنا بانت على حضرة البيه المبجّل عامل النضافة علامات الإرتياح لأن كانت أصغر فئة معايا هى فئة العشرين جنيه , وبعد حسرة وألم اديتله العشرين جنيه وصبّرت نفسى بكام كلمة واعتبرتها قال يعنى زكاة عن مالى وصحتى وشغلى والسفرية والكلام اللى يخلى نار الواحد تبرد ولو حتى بالكدب ، وانا لو ماكنتش عملت كده وصدرتله الطرشة وكبّرت دماغى كان أكيد سيادته هيحرجنى ومش بعيد يفضل ماشى ورايا يأنب فيا وانا فى وقت ما يسمحش بأى كلام ولا دوشة ، والموقف ده حصل بالفعل معايا قبل كده لما كبّرت دماغى من عامل نضافة فى مرة من المرات ، ولقيت العامل ماشى ورايا بعد ما خرجت وفضل ينادى عليا وانا عامل نفسى مش سامع ، والله كنت ماشى بسرعه كإنى عامل عملة ، وصاحبنا لما ملقاش منى فايدة فضل يبرطم بكلام انا معرفتش اترجم معانيه ، لكن بالتأكيد كان بيقول عنى إنى شخص بخيل وجلده ، وكأن البقشيش واجب وطنى زى التجنيد .
التعليقات