بمناسبة الحب والحبّيبة ومحن المراهقين يا أيها العاشق الولهان , هل جربت تحب وانت جعان ؟! يعنى بكل بساطة لو مش معاك حق الشقة ومصاري...
بمناسبة الحب والحبّيبة ومحن المراهقين
يا أيها العاشق الولهان , هل جربت تحب وانت جعان ؟!
يعنى بكل بساطة لو مش معاك حق الشقة ومصاريف الجواز ، يبقى فُكك من أحلام
العصافير و .. ( واحشانى يا عمرى وانتِ قدامى , وخلى بالِك من نفسك لاحسن تقعي من على السرير وانتى نايمة أو تخبطي فى حيطة لما النور يقطع )
، وركز مع مصطفى كامل أحسنلك وأغانية اللى تفقع المرارة عن الحب اللى ضاع والحلم اللى مش عارف جراله إيه ، يا ابنى يا حبيبى روميو نفسه لو كان قابل جولييت قبل ما يتغدى كان أكيد هينفضلها ويروح ياكل الأول وبعدين يبقى يشوف حوار جولييت ، ومليون فى المية روميو انتحر عشان ماكانش لاقى ياكل ،
وبالنسبة للحاج قيس الأهبل وحكايته .. صاحبنا اتجنن مش عشان كان بيموت فى ليلى ، ده اللى حصله ده بسبب ان ليلى كانت هتورث من ابوها لُكشة حلوة فقال فى عقل باله جوازة حلوة وموّزه جامدة تبقى الحياة عنب بناتى ، بس عمه كان عارف انه كحيان قال يعنى هجوزها لواحد ما حيلتوش اللضه وكمان اهبل ، راح موصّى عليه شوية عيال بلطجية كلوه العلقة التمام ومن ساعتها وعمك قيس بن الملّوح اتهبل اكتر وبقى ماشي يشحت فى الصحرا .
يا كل ضحايا المسلسلات التركى .. الحب والجوع لو اجتمعوا مع بعض هيبقى قدامك طريق من اتنين .. يا عقلك يروح فيها أكتر ما هو رايح يا إما تشتغل حرامى قد الدنيا وتقلّب عيشك عشان تتجوز اللى بتحبها وفى الأخر زهوة الحب هتروح مع أول زنقة وتشوف الملاك بتاعك اللى كنت شايفه قبل الجواز ناقصله جناحات بيضا من كتر الرقة اتقلب بقدرة قادر لقرد شمبنزى عمّال يصوت عايز موز وسودانى ، وساعتها هتلاقيه طلعلك فوق الشجرة اللى كنت بتقعد تحتها معاه بالساعات ..
يا صاحبى سندوتش اللحمة طعمه وقت الجوع
أحلا من كل كلام الحب والشوق والهيام .
***
محمد عبده زيدان
التعليقات